順興餐廳

营业中

休息中

本來約左朋友過九龍城食泰國野，朋友去到忽然轉軚話想食返d港式野，所以就去左順興餐廳食。鋪頭裝修新淨，座位舒適。 椒鹽豬扒小菜餐 - 隨餐有白飯中湯，中湯係花生眉豆雞腳湯，好足料，湯清而唔膩，湯頭非常甜，夠曬火喉。椒鹽豬扒賣相唔錯，豬扒夠厚，有咬口富肉汁，唔會黐牙，煮得好惹味，鹹鹹辣辣，送飯一流。 菠蘿包 - 菠蘿皮夠曬香脆，麵包幾鬆軟，而且夠奶香，唔會太甜。 魚蛋鮮魚湯米線 – 米線同配料好足，鮮魚湯底飲落唔係味精湯，味道唔腥，有濃濃而帶點甜味的魚味，飲完唔會口渴。 魚蛋係無經油炸的白魚蛋，食落新鮮彈牙而有魚味，無腥味。 無冰奶茶- 由於無加入冰塊，所以奶茶味道唔會越飲越淡，口感香滑，奶味濃厚，甜度剛剛好，在口中的回甘時間明顯比一般奶茶持久。