拉麵來 (已結業)

好耐冇食拉麵啦，咁啱約左朋友係銅鑼灣食飯，就行去大坑就去左呢間咁有日本風既拉麵來試下。舖面唔算大，但係佈置得真係好似幾十年前既日本小店，即係有時都會係日劇見到果種，幾有心思。我地分別叫左牛舌牛尾湯拉麵，櫻花蝦豚骨湯拉麵，小食日式餃子，仲加左紫菜同溏心蛋，好豐富呀～首先試既係牛舌牛尾湯拉麵，佢既牛舌真係好林，好容易咬，當然仲有濃郁既牛尾湯既味道啦～佢碗麵仲有好多蔥同埋筍做配料，好食到我停唔到口！追加既溏心蛋有流心效果，好好味。朋友叫左櫻花蝦豚骨湯拉麵，我未試已經聞到好香既蝦味，問朋友夾左少少試食，真係同牛舌拉麵一樣咁好味～有好多櫻花蝦之餘，仲有蔥，京蔥，木耳同叉燒，朋友話同拉麵一齊食，絕對係齒頰留香，加上有少少辣既豆瓣醬，更加惹味！日式餃子都唔差架，皮薄餡都算多，唔使40蚊有5隻餃子，真係唔係間間餐廳都肯做架！食完加埋罐zero，啱啱3舊水，可能大家會覺得貴左少少，但係呢間小店既拉麵的確有自己既特色，食過就知值得呢個價啦！