稻香 (已結業)

同媽媽慶祝母親節，揀咗大牌子嘅酒樓-稻香，一來呢間稻香嘅地點好近媽媽，二來係呢啲大時大節，好多酒樓都會坐地起價，稻香價錢亦都相對合理。今次叫咗一個雙拼（有波士頓龍蝦配伊麵+例牌燒鵝）、瑤柱蛋白炒飯、滋補花膠雜菜煲。先講講個雙拼，兩個餸加埋$288都算抵食，燒鵝係好食，熱辣辣之餘啲肉嫩滑有肉汁，而且入味，但對龍蝦配伊麵就唔好太大期望，冇乜特別，伊麵更加比其他餐廳遜色。值得一讚係個瑤柱蛋白炒飯，不單止有鑊氣，而且啖啖都有瑤柱絲，好抵食！至於個花膠雜菜煲就不過不失啦，但係得好少花膠仔（不過都預咗嘅），而且都係用啲比較平，超級市場都買到嘅花膠。可能適逢母親節前夕，而且又係星期五，所以都好旺場，接待署職員安排座位就比較亂，例如我見到明明有人已經訂咗枱，職員叫佢企埋一邊，等緊轉頭有枱就俾佢入。但係唔知係咪另外一個人又同佢個職員相熟，就咁比佢入咗先，搞到明明等候緊人啬即時向職員表達不滿，好彩最後職員都處理左。