北京樓 (星光行)

营业中

休息中

生日飯，前一日book 左位，要求坐近窗口，但嚟到冇得近窗口，待應話有book 左，但最後我地食完飯窗口個兩張枱都係冇人坐。第二次嚟食飯，今次叫左六樣嘢食，半隻烤鴨、菜苗、生煎包、炒年糕、咕嚕肉同埋雜錦炒飯。烤鴨係最signature 嘅菜，鴨味好香，尤其係食用鴨皮包嚟食嘅時候特別香，個人喺北京食完填鴨，北京有多過一種醬，配料會有洋蔥同埋紅蘿蔔絲，味道比較豐富，但北京樓個醬已經吊到鴨肉嘅香味！菜苗唔係度度有得食，呢度嘅菜苗有爽夠香，我哋已經係第二次食。雜錦炒飯雖然好似平平無奇，但廚師炒得好好，飯粒乾身分明，飯有少少Q彈，又夠香，幾乎每粒飯都有蛋包住，夠鍋氣但又唔會油膩！反而，生煎包，炒年糕同埋咕嚕肉比較失色。生煎包包皮唔煙韌，幾厚，食落有爆汁，但湯汁唔係好夠味，可能比包皮蓋住咗。炒年糕不過不失，冇咩特色，年糕夠味又有咬口。咕嚕肉整體唔錯，真材實料，唔會太厚粉漿，但下次再嚟北京樓，相信唔會再點一般大排檔都食到嘅菜，試下其他特色小菜會唔會開心啲？