牛角日本燒肉專門店 (已結業)

朋友話想食日式燒肉，於是為佢豪一豪食散叫燒肉啦，滿足吓自己同朋友！點餐模式同日本好相似，有部平板電腦俾你點呀點。全部都係中文字，又多款揀，慢慢揀！叫咗個燒肉五品盛合-燒肉汁，有牛舌、雞件、豬頸肉、上級牛肋肉、胸腹肉。當中以牛肋肉最有牛味，每塊長闊比例相約，感覺好有質素。點醬油都好特別，除咗有辣醬同醬油點外，仲有啲特色醬汁，有個呈奶黃色嘅，仲有啲芝麻，呢個咸得黎有少少令人上癮，因為唔係死咸。唔想點醬汁都可以混合其他配料一齊食，叫咗個綠葉生菜拼盤。生菜脆卜卜好新鮮咁，夾上自己喜歡嘅肉類，同埋配料，啲配料都好韓式下（呢家明明係日本燒肉店？！），有辣醬啦，生蒜片啦仲有Kimchi，放晒落食好refreshing, 肉同菜有咗個平衡點。唔係好夠飽，叫多碗泡菜牛肉bibimbap石頭鍋飯，材料都幾足下，包括泡菜、肥牛、芽菜等蔬菜，連埋韓式辣醬撈撈撈，每啖都有料有飯，感覺好健康同實在返。後記: 最後玩吓部平板電腦，分別按吓「要加茶」同「埋單」，睇吓邊樣反應快啲。結果當然係叫埋單快啲，唔使兩分鐘就有得埋。茶呢，按咗兩次等咗5分鐘，仲要叫多次路過嘅侍應先有。當時餐廳8成滿。