四十一冰室 (已結業)

週末行開石硤尾、美荷樓一帶，朋友提議不如順道去埋四十一冰室，抖下，食下，慢活下～冰室裝修後地方都依然咁闊落，好多位俾人慢慢揀，揀左個好本土特色嘅「正呀喂」坐低，又慢慢再睇下食乜。諗好就去落單，order完店員先俾左餐湯同飲品我地拎番去，同之前一樣都係玩自助形式。杯香蕉可可沙冰都幾好味，蕉味算突出，同可可好夾。飲完湯，雜錦海鮮炒意粉就泥，意粉彈牙有咬口，香香辣辣，又多餸，雖然唔係咩貴野，不過份量都夠多，幾抵食～食食下個制又響，西班牙烤乳豬拎得lu，呢個要趁熱食，個皮好薄，一咬「嘩好脆呀」仲要好juicy，肉質好嫩滑，只係略嫌有少許雪味，如果處理埋就perfect～香草燒春雞等得耐少少，食完脆皮乳豬再望隻雞，即刻吸引力大減，而且肉質較實，相對無咁好食，但都掩得入味，個燒汁好濃郁。兩碟嘅配菜都一樣，蕃茄甜，椰菜花偏咸，同薯仔一齊食剛好～總結呢間裝修後嘅美荷樓冰室，食物質素都ok，份量夠大，地方又夠闊，坐幾耐都無人理，好啱鐘意慢慢坐慢慢食慢慢傾嘅人泥～