位於觀塘駱駝漆大廈既Sous Vide，餐廳名稱正正係法文慢煮既意思。是日星期六，同朋友係大廈到行完街買完超值既戰利品後就黎到餐廳。傍晚七點幾到，餐廳已經坐左唔少人，好彩我地預先book定檯，如果唔係真係分分鐘空歡喜一場。
坐低後店員就為我地送上menu，價錢由百幾蚊到三百幾蚊不等，有湯，前菜，主菜，甜品同埋夏日果茶。
夏日果茶
落單之後果茶好快就送上，果茶味道唔太甜，入口好有茶香味，好舒服。
前菜係雞肉沙律，嫩滑既雞肉配上車厘茄同我最喜歡既芝麻汁，味道好夾，沙律菜亦都好新鮮。
是日餐湯係南瓜湯，南瓜打成蓉整成既湯，味道香濃，質感幼滑，仲可以配埋焗得香脆既蒜蓉法包添。
主菜分別係西班牙伊比利豬鞍/北印度乾飯/蘋果薄荷慕斯同埋烤帶子大蝦/青口/鯷魚蜆肉海鮮意大利飯。
豬鞍/北印度乾飯/蘋果薄荷慕斯
豬鞍外層香脆，肉質鬆軟，無經太多醬汁醃過既豬鞍，原汁原味，配埋伴碟既薄荷醬，味道清新，不過建議可以考慮試用純蘋果醬, 可能會更加夾。
伴碟既北印度乾飯都係第一次試，賣相有少少似意大利飯，裡面混了提子乾同乾果，好有口感。
大蝦/青口/鯷魚蜆肉海鮮意大利飯
意大利飯入口creamy, 材料豐富，賣相吸引。除左大蝦同青口之外，意大利飯裡面亦都加入左鯷魚同蜆肉碎，非常有創意。
食完主菜，係時候食甜品，只要like facebook 就可以享用朱古力慕絲。
朱古力慕絲味道香濃，朱古力味重，一d都唔苦，值得一讚。
晚市套餐可以用半價享用特色飲品一杯。我地叫左玫瑰拿鐵同抹茶拿鐵。
玫瑰拿鐵入口帶陣陣玫瑰香味，加埋咖啡香味都幾好味。至於抹茶拿鐵，抹茶味都相當香濃，唔會過重，唔錯。
以每人二百幾蚊黎講，可以食到咁多野，有前菜，湯，麵包，主菜同飲品，算係性價比高。
