SAMA HK (已搬遷) 新店位置

又到TGIF，同事話想食Sama，不過由於店舖好細，我地都要偷偷地早走去搵位。不過去到都已經要排隊，等左半粒鐘先有檯。呢到只食日式咖哩，先選辣度（0-30），再選咖哩「湯底」（蕃茄/椰子/蝦），最後揀餸（豬/牛/雞/海鮮/野菜），怕辣既隊長揀左Baby bear 0度辣+蕃茄湯底+漢堡扒，至於其他同事都食都係食BB辣3-5度。呢到係師傅逐碗逐碗煮，所以真係等得幾耐，心急人免問！咖哩陸續上檯，一碗咖哩+一碟飯，碗咖哩都幾多菜，有秋葵、蘆筍、青椒、粟米芯、西蘭花、椰菜花、紅蘿蔔，試下d咖哩，由於我叫左蕃茄湯底，會見到d蕃茄蓉係咖哩到，因為唔辣，個咖哩食落係甜甜地，而且呢到既咖哩係真係好似湯甘，唔係杰既。再試埋同事既辣咖哩，我諗唔食得辣既人，最多只接受到3度辣，同埋咖哩都係配椰子夾d，因為蕃茄食到尾可能出水，令到個咖哩好稀，不過我地一致都覺得咖哩好味，但d肉煮過龍，好鞋。由於樓面得一個人，佢都忙到一腳踢，所以都係粗聲粗氣果種，不過晏d無甘忙都過黎同d客「灑冧」。