叁薯 (已結業)

米芝連的小食店位於不起眼的巷仔之中，但係好多人及慕名而來，適值食飯嘅時間座位都全部滿晒，加上座位並不多，都需要等差唔多10分鐘先有位。雖然店舖細，但係都骨子，要叫嘢食就需要去收銀枱叫同俾埋錢，食物做起就會攞到你嘅台上。套餐就有一個主食，一個小食再加埋一杯野飲。主食可以選係最出名嘅焗薯又或者可以揀熱狗又或者意粉。今日就揀咗佢最邪惡嘅重量級芝士焗薯，初頭以為焗薯要等好耐，但係唔使5分鐘已經整咗出嚟，好快手。薯仔上面嘅芝士用咗兩至三隻唔同嘅芝士撈埋，芝士味非常之濃郁，好味。而且上面仲加左啲酸芝士做緩衝，不錯。我最喜愛嘅就係佢上面仲加左啲洋蔥碎，食落去夾雜着洋蔥嘅香味，令口感，層次，更上一層樓。另外仲叫咗個吞拿魚熱狗，雖然普普通通嘅熱狗好似毫不起眼，但係加埋吞拿魚同埋芝士即刻惹味得多。小食其中一個就揀咗呢一個彩虹脆雞粒，未食淨係見到個樣已經好靚，好吸引。咬落去外邊嘅脆脆好脆口，入面嘅雞肉仲出緊煙。另外仲叫咗一個特飲同埋一個梳打，比起普通嘅汽水好得多。