好嘢！又有一間好嘢食嘞！一入餐廳，第一眼見到裏面都好乾淨，有人會招呼問你幾多位，又會儘快送上茶問你食啲咩，好有親切感，好有老街坊feel。
坐低後老公就要咗碟鹹魚雞粒炒飯同凍啡；
我就要叉燒鮑片米同菊花蜜。
從未食過一間食肆啲米粉係咁滑同唔碎o架，因為好多都係滑得嚟就碎晒、一係就o鞋拾拾，老闆娘好好o架，菜都比其他人多啲o架；杯菊蜜對我嚟講就啱啱好，唔會過甜。
(不過就要因人而異嘞！)
老公個飯就要等多一陣，(大約五至十分鐘)
因為係逐碟炒，好夠鑊氣，呢間舖頭個師傅煮o既食物全部係逐碟炒o架，
佢唔會一次過炒幾碟或者炒定先咁樣上比客人囉，感受到佢o既用心，夠熱之餘重好香噴噴，
未入口已經聞到陣味令到你漏口水想去食，師傅好嘢！咁樣留客o既方法真係一流。老公話杯啡都好掂！價錢算公道，佢午餐時重會有蒸魚、蒸肉餅o添噃！下次再試過先得！
