茶匠 清水一芳園 (已結業)

每次經過都好想試下佢嘅厥餅，但因為最少要買50g，望落好似好多，怕一個人食唔晒會浪費，所以次次都係望下就當食左...今次終於等到有人陪我食，2個人食50g，應該冇問題啦！50g 只可以揀一款味道；80g可以揀3款；100g可以揀4款，雖然好想試兩個味，但好忍手買住50g先，最多好食嘅咪再encore 囉~買左黑糖味返屋企食，我仲以為新鮮嘅厥餅係唔洗雪，點知俾錢嘅時候cashier 喺雪櫃攞左一盒pack好左嘅出黎，宜家天氣咁熱，拎到返屋企咪會有倒汗水，啲黃豆粉咪會溶同黐定晒囉好喇，返到屋企好開心咁要食佢喇，男朋友首先放左落口，第一個反應係「唔好食嘅！」我即刻試一舊啦，依，真係唔好食嘅喂！佢個質感腍得黎有啲削，冇咩咬口/煙韌嘅口感，黑糖味唔出，淨係食到甜味。黃豆粉唔知係本身唔夠定已經溶左、每舊大細不一(唔可以用「粒」黎形容，因為都算大「舊」)好彩只係買左50g，叫做勉強食晒，同埋應該冇下次。