天 · 悠蔬食 (已結業)

星期四晚同男朋友食飯，叫咗兩個dinner set。餐廳裝修好少女好夢幻💖幾適合打卡~中湯好足料，夠熱，好好飲!!西湯不過不失，個人認為中湯更出色。中湯前菜係配烤夫，我第一次食🤣不過略嫌太多醬汁，好鹹😕 沙律就正正常常，羽衣甘藍好爽口。嘢飲我哋嗌左冰茶，幾解渴唔錯主菜一份係意大利飯，好有驚喜!! 炸魷魚圈食落完全唔似食素，好有口感。成個飯都好惹味，配埋啲雜菌同蔬菜，食到停唔到口。不過留意到啲飯唔似係平時食開細細粒嗰種。另一份主菜係焗千層麵，又係超好食！最鍾意入面嘅南瓜同番薯，配埋超多芝士，麵唔會太淋，又唔鹹，男朋友係咁話好味🤣🤣甜品我哋嗌左泰式奶茶千層蛋糕(+$25)，同埋紅豆糕。千層蛋糕唔太甜，不過略嫌皮有啲硬，整體都好好食，唔會好漏。紅豆糕都好食，不過椰奶味唔夠出，但我都好鍾意😋整體印象都好好，估唔到素食都可以咁好味。餐廳職員都好nice，見我哋咁遲先嚟食仲同我哋傾偈。不過略嫌價錢少貴，但食物質素好好，環境都舒適，有機會會再嚟過。