阿瑪港澳門餐廳 (已結業)

同太太一心到機場2號客運大樓搵食，但心水唔多，只有上海菜館、薄餅店或者呢間澳門茶餐廳考慮下。結果因為兩張小食贈卷，有著數(貪心)之下，就決定入去。入到去先知，原來機場職員係有員工價o既...因此點倆個餐：牛筋腩河連小食榨菜鴨腎、雜扒飯、餐飲一凍一熱奶茶；另加小食卷送o既瑞士雞翼x2隻。牛筋腩河份量幾多，而且味道唔錯，牛筋淋牛腩亦入味。榨菜鴨腎，鴨腎味道ok而且都幾爽口，反而榨菜有驚喜，充滿麻香。雜扒飯錯意粉，反而錯有錯著，意粉竟然好好味！軟硬適中，煙韌有口感，正！雜扒味道都ok，但最特別係款式比平時多，有腸仔煙肉、牛豬雞三扒，超值！瑞士雞翼我一向唔好，不過都覺得呢道o既瑞士雞翼幾入味，仲好滑添！近來都無乜飲過好味o既奶茶，一係唔夠茶味，一係唔夠奶，更甚兩者都冇！？呢道果然係茶餐廳，奶茶掂！整體係令人滿意o既一餐！p.s. 如果唔係員工的話，價錢都唔平。但對比附近其他食肆，又差唔多啦...