沙嗲王 (黃金廣場)

营业中

休息中

係銅鑼灣既街頭上諗要食乜，話難唔難，始終周街都係野食，話易又唔易，都係因為太多選擇唔知點揀好，諗冇可諗下，食沙嗲王啦。環境：我地3個人坐4人既卡位，肯定唔會迫，同埋呢度既裝修佈置都幾靚。服務：雖然星期六既晚上好多人，侍應都好忙，但佢地既態度都幾殷勤，唔會因為多人以迫你快快脆落好單咁。衛生：衛生情況都還可以，不過食食下聞到消毒藥水既味，望一望原來係做緊清潔，邊食邊清潔感官唔係咁好。味道：蒜香牛油雞翼好香蒜味，炸得好香脆，但味道偏鹹。奶油津白上菜時有d意外，估唔到咁細碟，但有配上津白既best friend 鹹肉，都幾入味。Pizza夠晒迷你，不過都好，因為唔好味，食落酸酸地，所以細d仲好唔使浪費。XO醬炒蘿白糕略嫌炒得太lon，但其實味道都幾唔錯，少少辣又唔會太鹹，好野味。要推介下呢杯菠蘿碧海，一開始見佢藍色咁棧鬼諗住試下佢，點知一試愛上，由話梅帶出既甜味有別於一般梳打既死甜，再加上basil seed個口感非常新鮮！抵食：二百幾蚊食既野大部分都好普通，但考慮到呢度係銅鑼灣，所以都算抵食既。