麻辣仙宮 (已結業)

呢日lunch 勁想食辣野, 所以黎到呢間麻辣仙宮刺激下我既味蕾! 一入到黎呢度就覺得D座位好舒服,好多都係卡位, 我地兩個人都可以坐到一張幾闊落既卡位! 我地都超想食烤魚, lunch都食烤魚好似好誇張,但唔理啦,我地叫左個推介既極鮮青花椒味招牌烤魚! 叫左小麻同微辣, 雖然係微辣,但食入面D 蔬菜個陣都覺得幾辣~ 跟住我地就再叫多個午市一人套餐, 涼拌小食叫左蓮藕仔, 主食叫左口水雞, 野飲就叫左烏龍茶! 我好想飲椰青,所以都叫左個椰青! 椰青配辣野真係一流! 佢既椰青超甜! 蓮藕仔超爽口,送飯一流! 口水雞又夠哂惹味, 重點係佢所有野既份量都好多, 我以為蓮藕仔得細細碟, 點知有一大碟, 個份量可以當做一個主菜咁! 口水雞又估佢唔到咁大碟, 件件都好大件,唔係碎濕濕個D! 到烤魚出場, 我地叫左江團魚, 個魚一D都唔腥! 午市叫主餐牌仲有88折, 好抵食! 個魚係先煎到脆, 再放落去煲,而爐入面仲有D蓮藕, 芽菜, 雲耳等等! 蔬菜食入口都覺得少少辣, 個魚就超滑,有半條, 都幾大條! 下次黎要試下打邊爐! 滿足既午餐!