回到味來 (已結業)

涼涼地又想食雞煲，今日揀左呢間回到味來，網上好評超多，訂位又有折。餐廳位置喺旺角新城，一出lift望到餐廳比想像中細喎，好在有訂枱。呢度大部都係卡位，梳化位，坐得舒適，同朋友傾下計吹下水都得，唔會話催催趕趕。我地睇左餐牌，好快落單，其實呢度有d套餐幾抵食嘅，不過唔知點解最後我地都係變左散叫首先點左個雞煲，可以揀微辣，如果食得辣，可以挑戰佢地嘅惡魔雞煲，分小辣，中辣等，愈辣就會有折，不過我地食開譚仔三小架咋，點左惡魔少辣就算。雞煲上枱好吸引，點左半隻，睇落都足料嘅，有好多種辣嘅配料，辣椒、花椒、八角等等，仲有大量芫茜，好香口。雞件唔算好多內，但個煲真係好入味，又辣又麻，好過癮，食完就可以加湯打邊爐。我地點左手打蝦滑，蝦滑好新鮮彈牙芝心墨丸推薦，佢成粒好大粒，然後有墨魚口感，芝心有夠流質，正。菜肉餃好得意，餡料係扎實嘅，有D似燕餃。造型好搞笑，用個啤酒樽裝，又幾特別。是日送嘅係墨魚同沙白。之後點左菜心苗，菜苗夠嫩，淥落個雞煲，又辣又爽。最後點埋個麵，滿足。