飯飯店 (已結業)

老公細細個住喺炮台街，依家棟樓已經拆咗變成小公園，佢每次經過都會講起，今晚都唔例外，我地行吓行吓見到有兩間食店喺漆黑街道中燈火通明，其中一間係飯飯店，見到都坐滿哂得番門口張十二人大枱要搭枱。差不多枱枱客都叫脆皮炸豬手，個餸上枱新鮮熱辣，外皮脆得嚟唔會好硬，豬手肉咸香適中。小炒皇有韮菜、腰果、蝦乾、鮮蝦、魷魚等，鮮蝦同魷魚雖然唔係新鮮貨色，不過炒起都香口，下酒下飯都啱。花雕蛋白蒸蟹等咗差不多一個鐘，上枱時花雕味好香，蛋白滑溜，蒸蟹就一般貨色，食起上嚟比較水。食店雖然位於油麻地比較僻靜位置，但都吸引到唔少食客光顧，小炒比較出色。