景記咖啡 (已結業)

由細到大都好鐘意去街市熟食中心食野，覺得價錢平﹑食物選擇多又好味。去完同樣被英國統治過﹑一樣勁多熟食中心既新加坡，好多出名美食都發源於此，令我回港後更愛到熟食中心揾食。是以今日喺中環處理完事務，就算見中環街市摺左，都要行去上環街市食早餐呢！到了上環街市熟食中心，人唔多，食早餐既兩家茶檔都係得幾個人打躉，其他做午市的就忙著準備，行了一圈，決定去第一檔經過的景記。早餐有4款，分別係魚柳﹑牛扒﹑雞扒牛油麵包餐同麵餐，另有三文治餐。我選了雞扒，除了牛油麵包，還有芝士腸蛋供吃，由於不吃蛋，店員讓我轉了火腿，最欣賞呢啲靈活呀！老公則選了沙爹牛肉麵，另外，我對奶油多尤其鍾愛，去親未去過又有供應此物既食肆都會整番件食下，呢度都唔例外呀！等左一陣所有食物先後上齊，芝士腸﹑火腿同雞扒雖然有點油，但跟牛油麵包同吃感覺冇咁肥膩，雞扒煎得好靚，金黃色的皮又脆，唔駛加蒜蓉汁都好味。沙爹牛肉麵既公仔麵煮得剛好，夠彈牙，沙爹牛肉調味唔錯，亦唔係梳打粉喪醃既變種牛，又係好味！最後食我至愛既奶油多，厚多士喎，意外呀！唔駛我多講，望落去就知對味啦！