金華冰廳

营业中

休息中

香港嘅茶餐廳，主要都係分為兩大種，一種係裝修懶靚但收中價嘅價錢，另一類就係一種好噏耷嘅環境，但係主打情懷但仍然都係收中價嘅價錢。金華茶餐廳，就係主打後者啦。你入到去就千祈唔好要求啲乜嘢特別嘅Service，明白香港飲食文化嘅就知道，茶餐廳本身，就係一種原本服務比較草根既飲食文化，食個快餐，飲杯奶茶，快快上班，呢個就係傳統舊式茶餐廳所傳承嘅文化。佢哋嘅蛋撻，曲奇餅底，夠熱亦都唔太甜，食落有一種港式情懷嘅味道。佢哋奶茶非常之傳統，雖然我嗰日order嘅係凍奶茶少甜，但係呢種凍奶茶嘅味道，相當之好飲。其他嘢， keep住一般茶餐廳嘅，水準不過不失啦。最後，舊式茶餐廳嘅特色，就係位於特別窄，夥計服務特別燥，正正就係呢一種唔打唔舒服嘅服務精神，成全左香港獅子山下嘅獨有精神。嗰啲聲稱茶記冇質素服務又差果啲美食家，想要服務嘅話，建議你上橋轉彎，去新世紀廣場，旺角舊式嘅茶記唔會啱你。