鐵牛台灣牛肉麵 (旺角中心第一座) (已結業)

情人節竟然去咗食台灣野，又真係幾特別，好多人，所以邊個話一定要食西餐～間餐廳都幾得意，主要係首先攞咗位置然後填寫要叫嘅食品，之後就出去俾錢，因為張單本身已經有人幫手寫咗枱號，就方便過連鎖快餐店，起碼可以乖乖地坐低人哋拎餸菜過嚟。木魚炸豆腐兩件＄30睇外表好似普普通通，但係上面啲木魚彈下彈下都幾過癮。炸豆腐裏面其實都好香滑，而且油香十足，外皮香脆裏面滑嫩。鹽酥小拼盤＄45拼盤裏面有鹽酥雞，番薯條同埋花枝丸。鹽酥雞雖然唔算太香脆但係表面鹹香十足，裏面啲肉依然保持水分。番薯條就幾夠特別，表面有一啲話梅粉，令到味道又酸又甜，好唔錯。花枝丸就比想像中冇咁有好感，雖然單啊但係裏面食唔到實在的魷魚，可能打得太碎，不過調味亦唔錯架啦。酸菜滷水大肥腸＄42好似除咗肥腸之外都有少少滷水豬耳，整得好入味之餘裏面都好乾淨，有彈性唔會得個稔字。啲酸菜仲可以撈麵一齊食，豬耳就夠晒爽口啦。主廚私房牛肉麵$70男朋友個牛肉麵，裏面有牛筋腩牛腩，都係炆得好稔又夠晒入味咸香十足，麵質都有彈性。湯底比起新竹米粉更加濃郁。蔥燒豬軟骨肉燥新竹米粉$59豬軟骨真係有啲硬有啲軟，太硬嗰啲食唔到，不過都係整得好稔，再加埋燒過更加香。