羅麥記 (已結業)

我同女朋友提前慶祝咗情人節，咁啱情人節正日打算行維園年宵，所以揀咗位於希慎廣場13樓嘅「羅麥記」醫醫肚。話哂我對曾經食過嘅「羅麥汁牛河」印象難忘，加上餐廳位置方便，價錢亦合宜，所以二話不說就揀食呢間充滿港式風味嘅茶餐廳。可能早到嘅關係，等咗大約十分鐘左右就入得。入到去，除咗嗌返我想再食嘅「羅麥汁牛河」，我同女朋友喺「百變撈丁系列」芸芸咁多口味中揀咗「韓式泡菜炸雞撈丁」，又泡菜又炸雞，係幾吸引嘅！嘢食好快就到，將羅麥汁，牛肉同河粉拌勻後，味道似瑞士雞翼汁嘅「羅麥汁」咸甜適中，牛肉腍身軟熟，河粉爽口份量多，兩個人share啱啱好，但一個人食曬就會有少少濟。再嚟就係「韓式泡菜炸雞撈丁」，出前一丁麵同泡菜融合得幾好，食落有陣陣嘅辛辣口感，令人眼前一亮嘅係「炸雞」，唔單止份量多，咬落去絕對唔差過專賣炸雞嘅韓國餐廳，我認為值得一試！！食完今餐真係好滿足，下次再嚟我想再試埋「撈丁系列」嘅其他款式。