綿綿冰甜品屋 (已結業)

自從上次食過呢間綿綿冰之後，去到任何食甜品嘅地方都會有意無意睇吓佢哋個餐牌有冇刨冰賣，喺九龍城金滿堂都食過一次，但係完全唔同嗰種感覺，九龍城嘅實在太粗，冇咗細滑嘅美味！曾經滄海難為水，雖然山長水遠，星期日有時間仍然唔介意用兩個鐘頭車程來回入去解吓冰毒癮！今次我哋就要咗哈蜜瓜味，配黑珍珠、荔枝椰果、三色Q果同埋芒果糖漿。哈蜜瓜味綿綿冰外表呈青綠色，份量好似比上次三月嚟食時細咗，刨冰密度亦粗咗而且好快溶，食落亦冇咁滑！雖然係咁，但係味道仲係一流，仍然值得大力推介！綿綿冰入口甜蜜而冰凍，芒果糖漿冇過份甜又或者搶咗冰本身嘅水果味道，椰果同珍珠都好彈好爽，真係好得！希望佢係因為太多人幫襯先至令出品有啲參差，唔好保唔住水準就可以嘞！一定會再嚟！