老二公社 (已結業)

早幾日係openrice無意中發意呢間餐廳，覺得好得意，環境又幾好，就打算星期日同朋友一齊黎坐係傾下計啦。Cafe位於旺角唐樓四樓，行上去比較攰，不過好彩上到去就有位坐，一坐低仲有水飲，每杯水裡面仲會有粒冰，冰裡面仲有粒士多啤梨或桃，好精緻，值得加分。野食方面算係普普通通，都係一般cafe食到既野， 我地叫左2個餐，一份雞翼薯條，一份肉丸薯角，每個餐都有配飲品一杯。薯條同薯角都熱騰騰既，非常美味，好有火爐，最重要既係唔太油。蜜糖雞翼幾香囗，蜜糖味都幾重，好滿足。至於肉丸方面，係豬肉丸，真係適合唔食牛肉既我，肉丸仲青青地，無咩肥豬肉，個肉汁仲好好味，有D似某大型傢俱店食到果D。飲品方面，我地叫左2杯唔同既咖啡，下圖細杯既唔記得左係咩啦，味道OK，加上細細杯，唔係好抵，大杯既係hazelnut 咖啡，雖然大杯，但係有點兒過甜，有改進空間。食飽之後就梗係參觀下間Cafe啦，呢到好多野睇，仲可以周圍影相，最得意既係有間兒童車，裡面仲有個BB係到，好可愛，攪到我都忍唔住同佢影左D相。老二公社真係幾好坐，下次一定要帶多幾個朋友試埋其他食物。