見見面 (亞皆老街) (已結業)

今日同朋友出去旺角到咗食晏時，朋友話天氣凍，好想打邊爐，啱啱講完，就見到對面馬路＂見見面＂廣告牌，即刻上去試。我哋嗌咗海鮮餐，朋友又唔食得辣，所以嗌個滋潤嘅椰子🥥雞湯底，湯頭味道清甜帶濃郁椰香味，雞肉嫩滑。店員好快就上咗－盤好靚嘅海鮮拼盤，包括有：鮑魚、蟶子王、肉蟹、青口、帶子、扇貝、大蝦、沙白王。鮑魚，食得出好新鮮，口感爽彈。蟶子王超大隻，超級鮮甜美味，碌一碌就好容易離殼。肉蟹，蟹膏肥美，肉質鮮甜飽滿。大蝦蝦頭好多蝦膏，食落鮮甜，肉質爽口彈牙。青口都幾厚肉，帶小小鹹鮮，而貝殼類嘅帶子同扇貝一樣，同樣鮮甜美味，真係好耐都未試過食海鮮食飽肚嘅感覺！但係既然打得邊爐當然要有返少少肉類啦，店舖嘅安格斯牛小排、特級牛板健、特級封門柳、頂級牛梅花肉，都好有質素，食得出好有牛味，質素全部都有保證，色澤鮮紅，上枱之前都已經做好解凍，食落唔難嚼，反而軟軟柔柔！一句講晒，所有食材都好新鮮，貨真價實，而且真係旺角區平靚正嘅選擇之一，大家得閒快啲去試吓。而家店舖仲做緊優惠，2小時放題：12:00-17:00有6折17:00-00:00有8折