九井壽司 (已結業)

今日同朋友仔去megabox行街，行完街見肚餓，唔知食咩好，朋友話佢想食壽司，我地search下openrice見到呢度九樓有間丸井壽司，見價錢都唔貴，我地就決定今晚食呢間！入到去覺得個設計好得意，如果係一家大細黎食好岩呀，小朋友一定好中意，佢係用ipad落單，每次可以叫四款，然後就有一次抽獎機會，然後等一陣，就有架高速列車運壽司黎嚕，成件事都幾有趣架！我地先叫左三文魚、帆立貝、甜蝦壽司同三文魚加州卷試下，呢度既壽司食落都好新鮮，帆立貝食落仲好鮮甜美味！第二轉叫左火灸三文魚、魷魚壽司，海蜇同燒雞骨腸，個人推介燒雞骨腸，入面係類似台灣既豬肉腸咁，食落有肉汁又唔會太乾，個造型又可愛！第三轉叫左火灸芝士蟹棒同叫多次帆立貝壽司，仲有叫左芝士魚餅，火灸芝士蟹棒食既時候連埋啲芝士⼀齊入口真係好正！芝士魚餅就略嫌普通左啲，不過不失咁。最驚喜係呢轉竟然中左獎，中左盒蘋果汁好開心！總括黎講，呢間壽司有得食又有得玩，兩個人食到飽都唔使300蚊，性價比都係高既！