板上 (中海日升中心) (已結業)

今日同朋友黎觀塘睇開倉優惠，晏就黎咗位於中海日升中心嘅板上食lunch。餐廳非常寬敞，環境舒適，提供嘅食物亦都好多元化，有飯、漢堡、小食之餘，仲有蛋糕咖啡，好啱三五成群黎依度食飯吹水，更加令我地驚訝嘅係，餐廳有啤酒提供，而且有足球直播，係一眾球迷狂歡嘅好地方。我地叫咗安格斯牛肉漢堡‧脆薯皇($72)，漢堡非常大份，除咗安格斯牛肉之外，仲有蕃茄同生菜。牛肉有15mm咁厚，非常扎實，好有肉汁，冇乾爭爭嘅感覺。而薯皇外脆內軟，調味得好惹味。吉列蠔(3件，$28)，金黃色好吸引，炸粉非常薄，一咬已經食到蠔嘅鮮味。大阪燒($35)，係魷魚豬肉燒餅，用料豐富，上面滿佈柴魚，而且食得出粒粒魷魚。特色飲品跟餐都只係加$10，叫咗菠蘿蘆薈梳打(+$10)，清新解暑。就咁單叫特色飲品都只係要$20左右，紅豆奶茶($20)，甜度適中，奶香味好濃~總括黎講，一個餐都係$40-$70，不過質素就非常高，一啲都唔貴！