品越越式料理 (雅蘭中心) (已結業)

係旺角區返工，放飯得一個鍾究竟有咩選擇？今日就膽粗粗試一試品越！一入到鋪估唔到會完全無人，所以順理成章坐左係窗邊卡位。平時旺角咁鬼死嘈，但係竟然有個地方可以休閒地坐係到，但係望住人多車多既彌敦道，都咪話唔過癮，哈哈！不過一望個餐牌就知「大檸樂」，又唔記得左自己減緊肥，唔食得煎/炸/油膩野，點算好？無有怕，部長一見我猶豫緊食咩，就立刻上前為我釋疑，為我推介「雞絲扎肉湯檬」（本身係跟湯河，但因為湯河太油膩，所以轉湯檬），認真抵讚！雞絲同扎肉都比較淋同易入口，而且湯底都唔係話太重味精，食飽左都唔覺得特別口渴。整體黎講都唔錯，最重要係呢一餐都只係六十蚊有找！