滿屋廚房 (已結業)

約咗朋友放工嚟食飯，就佢係公司附近搵左呢間餐廳食，一入嚟見到出邊有位置賣手機用品，木製模型，廚房用品，餐具等等……感覺幾得意！旁邊仲有位置賣雞蛋仔！行入餐廳會經過一個俾小朋友玩嘅區域，覺得餐廳好貼心，雖然唔係好大，但係都有照顧到小朋友嘅需要！朋友未到， 我叫左凱撒沙律加三文魚，雞肉串燒同小食拼盤頂住肚先，雖然店入邊都幾多人，但店員態度都好好，而且上菜速度都好快！雞肉串燒個沙嗲醬好好味！超多花生好惹味！小食拼盤我就最鍾意個蝦餅，夠哂香口，而且旁邊都會拼一碟酸瓜之類嘅開胃菜，一食就覺得好開胃岩哂大熱天時！朋友黎到我就叫咗個溫泉蛋煙肉磨菇汁意粉， 佢就揀咗炸雞椰漿飯同龍眼冰，嚟到見到隻溫泉蛋已經好想食，撈落個意粉度真係好香好creamy ， 朋友話個炸雞都好好食，而且個椰漿飯好香！呢度另外仲有一樣野好吸引，就係好多甜品選擇！朋友叫咗紅桑子開心果餅，我冇試到，自己就叫左綠茶紅豆千層蛋糕，有好多紅豆，而且綠茶cream好香滑，簡直係完美嘅句號！