大姆指餐廳 (已結業)

近排有晚去咗呢間疑似同燉奶佬同一集團嘅大姆指開飯 (原本都唔覺得係同一集團的, 但坐低望到個餐牌就發現兩間嘅餐牌無論排版同食物都好相似的!!)，價錢平過燉奶佬少少, 但係呢度裝修靚啲, 樓底好高, 而且幾舒服乾淨~之所以入去呢度食, 係因為比呢個套餐吸引咗我入去~ $45有個麻辣茄子豬柳煲再跟白飯再有碟油菜, 另加$7有凍飲(或者加$5要熱飲或糖水都得), 價錢嚟講真係好抵食! 先嚟碟油菜, 正常份量啦, 冇乜特別. 過多十分鐘左右, 麻辣茄子豬柳煲就到了~ 呢個煲真係有啲驚喜, 嚟到已經聞到好香, 賣相相當唔錯, 雖然食落唔係好勁麻辣味, 係食到最底先多啲麻辣味, 但辣辣地都相當惹味. 而且份量都好足, 豬柳好似食極都仲有咁, 加埋茄子洋蔥等配料都好多, 用嚟撈飯食都幾好食! 後尾加$5要個糖水, 揀咗個熱蕃薯糖水都幾好食, 幾夠薑味同蕃薯味, 出面食一碗都要十幾蚊, 呢度CP值真係幾高啊服務就麻麻地啦, 因為見佢人手都唔多夠, 落單都要叫一陣先有人理.