金凱小廚 (已結業)

今次嚟到大圍嘅金都小廚，我朋友話有一間好抵食嘅串燒打邊爐舖頭，所以就同朋友去試下。今次揀咗198蚊嘅套餐，串燒可以每人任揀三款，我哋揀咗生蠔，扇貝，雞翼，牛脊肉，墨魚丸因為串燒需時，但係一食到就好惹味，推薦蒜蓉扇貝，好香口，全部野熱辣辣食好正，隔離枱都不斷叫串燒，性價比好高，所以我下次會轉任食串燒嘅套餐！跟住就係雞煲火鍋放題，首先有雞煲先，啲雞好多，而且好香口，好滑，熱辣辣推薦！之後我哋叫咗沙嗲湯底，佢呢度嘅沙嗲湯底係我食過最好食，好似平時食早餐好濃味嘅沙嗲牛肉公仔麵湯底咁，食牛肉同埋唔同配料都食到湯底嘅味道，非常推薦大家叫沙嗲湯底。另外牛肉亦都係可以隨意叫，安格斯肩胛牛肉推薦，有牛味，雖然好薄，但係呢個價錢真係已經好平，而且佢一盤嘅份量都唔算太少，最緊要可以任食。亦都叫咗唔同嘅丸類，上菜速度非常快，雖然舖頭都滿晒人，侍應都好快落單，最後雖然已經好飽，真係頂唔住加咗個公仔麵，好正！呢間舖頭性價比極高，下次我會叫串燒任食，同埋一定會再食多次！