麺屋武蔵 (已結業)

咁啱去開馬鞍山游水 聽聞呢到係美食沙漠 決定搵下究竟有無咩好野食哈哈結果行到新都城見到有間麵屋武藏 同個fd 不嬲都鍾意食拉麵 就決定入去試試佢!😋首先叫左個小食唐揚豆池魚 本身以為會有d似椒鹽九肚魚 結果食落冇想像中咁油膩 炸得香口酥脆 伴埋佢附上嘅芥末汁好開胃!之後叫左煎餃 味道不過不失 尚算皮薄餡多 然後再叫左兩客芝士年糕 呢道菜式幾有驚喜 年糕好煙靭軟糯 帶輕微甜味 出面用火炙芝士同紫菜包住一啖咬入口口感非常豐富!然後就到主角兩碗拉麵!第一碗係番茄豬頸肉湯拉麵豬頸肉燒得啱啱好 肉質唔會過老 有四大塊 好滿足番茄湯底好開胃 附上幾件番茄溏心蛋夠入味 蛋黃煮得啱啱好冇過熟至於麵身就係偏粗嘅拉麵 口感偏軟 掛湯力高 第二碗拉麵係白拉麵 我地揀左叉燒豚骨叉燒夠大片薄身 肉質唔鞋 夠入味豚骨湯底自己略嫌未夠濃厚 偏清新其他麵質 溏心蛋表現同第一碗相似最後叫埋杯菠蘿特飲 本身以為會好重藥水味 結果有少少驚喜 飲得出有落新鮮菠蘿汁總括嚟講食物水準不錯 價錢卻比出名拉麵店親民 環境坐得舒適 值得一試!