圓山台灣料理 (已結業)

圓山台灣料理位於尖沙咀美麗華旁邊，位置確實方便就腳，早知黎食過午市，不但抵食，食物質素及味道甚至比米芝蓮中菜好，所以今次特登黎試下晚飯既水準。侍應既服務態度一如既往咁友善，笑容可掬，而顧客中亦有不少是年輕情侶！《晚市套餐》套餐真心非常抵食! $328 可以自選四道菜，好多重點菜式都可以選擇到，相當吸引！先來前菜有爽口青瓜開開胃～《豆辨鮮魚》初初以為係麻婆豆腐，細看之下發現係我點既魚！面層既豆腐肉碎配飯食一流，而下層既魚雖然經過煎香，但唔會被上層既汁焗到毫無口感～《三杯雞》食台灣料理當然唔少得三杯雞！呢度既三杯雞下飯一流，麻油醬油份量恰到好處，雞件嫩滑惹味。《咕嚕黑豚肉》夏天最想食酸酸甜甜既野，咁呢個咕嚕肉就最好不過！黑豚肉有別於一般豬肉，肉質更細緻嫩滑，肉味較突出。《台式小炒》《極品流沙包 $35》不能錯過既仲有流沙包，每件都非常流心。見到流沙包既餡金黃色澤，已經垂涎欲滴！流沙餡不會太濃或太稀，質感滑溜而帶咸蛋黃香，味道偏甜。最後仲有足料紅豆沙，呢餐飯真係好唔錯又抵食！我同朋友都食得好滿足！