今次我地食OMAKASE 廚師發辦，睇下喺每人budget只有$400之下會有咩驚喜
每道菜師傅都會過黎介紹同問食後感，而且跟住我地食野速度上菜，好細心
前菜有：
師傅話由左至右，由淡到濃味咁食：芥末八爪魚、烤鰻魚配海帶、芝麻醬番茄夾芝士。我特別鐘意個番茄，一咬落去爆汁！
之後就到呢個刺身拼盤
師傅話日本沙甸魚當造。第一次食沙甸魚刺身，肉質好柔軟好滑，配上蔥花同薑蓉食，我覺得刺身比熟食好食。仲有三文魚楠、熟成左兩日爽口嘅鱆紅魚、魷魚紫蘇葉韓國海膽卷
（平時麻麻地紫蘇葉，不過呢三樣野加埋食就好夾，師傅話係另一主打）、甜蝦
軟殻蟹牛油果生菜蟹籽沙律
青瓜好爽口，師傅話原來用獨有日本學嘅手法將青瓜片薄再切條，所以特別爽脆！
再黎就係烤地雞扒
師傅建議九成熟，呢度既地雞都係日本飛機貨，可以放心食。
地雞扒用烤爐燒，雞皮烤到好脆，咸咸香香咁，無多餘肥膏，平時唔食雞皮既我都食晒！雞肉柔嫩而且好多汁！伴碟既醬其實唔洗沾已經好夠味
仲有吞拿魚卷
始終鐘意有飯落肚，卷外撒上芝麻 、三文魚籽，仲有特別加左天婦羅脆脆，口感好豐富
甜品仲有朱古力蛋糕
師傅話用純朱古力整架，食落好香濃又唔太甜
估唔到$400/位就可以食到咁高質新鮮嘅日本菜！
