蟹仙海鮮蒸氣鍋 (仁愛街) (已結業)

今日約咗個朋友交收，大家都話好耐冇食海鮮，於是約埋一齊嚟呢間專食蒸氣海鮮嘅餐廳，一齊擦餐勁。海鮮都有太多款，都唔知食乜好，真係幾花多眼亂，結果都係決定嗌套餐，人均不用400蚊，就可以試到十款海鮮，抵過入西貢食。侍應超細心，幫我哋將所有餐具碗碟都用咗蒸氣去消毒，感覺安心好多。大蝦、元貝、蠔、鮑魚等等嘅海鮮都擺成一個拼盤咁上檯，睇起嚟好豐富！元貝好嫩好鮮味， 而且夠曬大隻，入口好清甜。海蟹好多蟹膏，多到流曬出嚟！龍蝦好新鮮，而且仲係龍蝦乸，個肚有超多嘅龍蝦籽，我都係第一次見。東星斑原條清蒸，魚肉結實，好有魚味，平時出去食東星一般都唔平，呢個套餐包埋真係好抵食。特製魚皮食落卜卜脆，新鮮炸起，正過一般魚皮多多聲。食到咁上下所有海鮮蒸出嚟嘅汁都會落到鍋底配埋粥底一齊煮加埋啲配料就成為一鍋鮮味嘅海鮮粥，真係飽到一個點。最後送上一碗椰汁官燕甜品，秋涼嘅天氣食就最啱，夠曬滋潤。呢個價錢食到咁多嘢，而且食物又高質，實在幾高性價比，下次等屋企人生日，一於再帶佢哋食海鮮！