魚屋

营业中

休息中

自從東港城一田開幕以來，令到我終於覺得住咗喺將軍澳10幾年終於有啖好食，就係因為呢間魚屋！坦白講最怕食魚嘅我，第一次幫襯佢，因為佢有我最鍾意嘅燒花魚，佢而家已經成為我嘅飯堂，除咗刺身飯，我最鍾意就係佢嘅燒魚定食，選擇多，因為用電腦嘅關係，魚燒得啱啱好，配一大碗白飯，再加上用蔬菜同魚碎煲嘅味增湯，性價比極高。今日我冇叫到我嘅最愛，反而試咗一個新嘅帆立貝吞拿魚茸飯，阿仔就係例牌，海鮮極丼。另外我仲叫咗個小食，係帆立貝海膽漢堡。海鮮極丼 - 阿仔貪心，乜嘢刺身都要食，所以呢個係最好嘅選擇，食咗10幾廿碗都有，簡單啲講，刺身新鮮，一碗飯有晒佢最鍾意嘅刺身，佢會將海膽同吞拿魚茸加豉油芥辣撈勻落啲飯度，三文魚，蝦，帶子做餸，總之＄158，係滿足嘅！帆立貝吞拿魚茸飯 - 真係好好味，帶子本身味道偏淡，燒過後加上明太子將，即刻將味道提升，吞拿魚茸夠新鮮，拌飯一流！嗰個漢堡雖然有啲細粒，但係勝在又有帆立貝又有海膽又有紫菜，＄58，都可以接受。過幾日都係食返燒魚定食先！