好彩入到嚟仲抓得住Happy Hours嘅尾巴，Suntory生啤只係$38，仲可以優惠價配小食，我哋當然唔會錯過。
粗薯條配黑松露醬估唔到份量勁多，黑松露醬都大大兜，勁香勁好味。
蜜瓜風乾火腿串係其中一樣我認為性價比極高嘅小食，一碟總共有四串，每串都有兩片parma ham同兩粒蜜瓜，食起上嚟夠晒方便，而且份量極多，真係勁勁勁抵食。
然後我哋就叫咗個二人套餐，餐湯係麵豉湯。
除咗湯仲有沙律，冇諗過跟餐嘅沙律係大大碟嘅凱撒雞肉沙律，份量簡直係主菜嘅size，而且仲有超多雞肉，好彩我哋係三個人分，先勉強食得晒。
主菜我哋揀咗澳洲牛肉眼扒，伴菜仲有蕃茄、黃瓜、薯蓉同原個焗蒜頭，牛扒又係大大塊。
牛扒入面嘅肉仍然保持粉嫩。
另一值得推介嘅係鹹蛋黃卡邦尼煙肉意粉，卡邦尼意粉加入鹹蛋黃之後就更加香同色澤更加金黃，煙肉經過微微煎香之後就更有鹹香，整體嚟講係食唔停口。
跟餐可以半價轉特飲，我哋當然唔會錯過，呢個士多啤梨益力多奶昔充滿士多啤梨香，而且打得夠香滑，大人小朋友都咁啱飲。
青瓜青檸梳打就非常Fresh，飲完成個醒晒！
最後食埋個甜品，楓糖蛋糕軟綿綿都幾好味。
呢間歡喜真係充滿驚喜，我哋三個不約而同話一定會再嚟！
