麥金.麥金馬來西亞特式茶啡室 (已結業)

麥金麥金馬來西亞特色茶啡室 之前咪食過一次，覺得幾鍾意，所以短期內就同朋友再嚟食一次。今次食嘅嘢同上次完全唔同，又可以試吓佢其他款，原來都一樣咁正。呢間嘢都真係可以算係價廉物美。我叫咗個蛋黃奶油勁量雞扒飯，見餐牌寫住係熱賣招牌，果然係好有驚喜，尤其是雞扒真係好正。雞皮炸到脆卜卜，夠晒香口。而入面嘅肉都唔會好乾， keep到有啲肉汁。蛋黃奶油汁出邊比較少油，都幾好味，質感係比較creamy嘅，有少少椰汁香味。仲叫咗一個怡保雞絲河粉，除咗有雞絲之外，另外仲有蝦同埋扎肉，都幾豐富，呢個湯底就比較清香，啱我口味。而小食泰式炸蝦餅，呢個就基本質素，勝在唔會好油膩，口感都算係幾大牙。都唔錯嘅。