NUTTEA (旺角中心第一座) (已結業)

疫情關係，盡量減少外出，但間唔中都要出去行下街，食下野，今日第一站黎到旺角中心呢間小店，之前聽朋友講話呢間野幾好飲，一路都好想試，原來旺角開左，所以就黎試下啦！我地十二點幾去到見到拉左半閘，原來佢開一點，所以就係附近行下等下，一到一點開門即刻勁多人排隊，好受歡迎！我叫左杯伯爵朱古力堅果奶蓋茶，店員好細心咁提醒因為朱古力飲到尾會覺得好甜好漏，所以會建議揀無糖或微糖，所以我就揀左微糖。另外仲叫左杯芒芒堅果奶蓋茶，正常甜度。店員比野飲既時候會講解下個飲法，其實個杯蓋都有寫架～記住拎佢地提供既奶蓋摌！首先可以摌啲奶蓋食下，充滿堅果味既奶蓋，咸咸香香，之後就打斜45度去飲，奶蓋浮面而可以充分飲到下面既茶，清新既伯爵茶味一湧而入，同剛剛既口感好唔同，最後既飲法就係完全攪勻，有少少似飲緊繽紛樂既感覺，好好味，亦幾飽！至於芒果個杯都有唔少既芒果肉，真材實料！同埋就冇朱古力個杯咁漏，值得一試！