老虎岩餐室 (已結業)

喺油麻地B2出口一出過對面馬路就係老虎岩餐室，超方便！餐室喺馬會投注站對面，去嘅時候係星期日賽馬日，餐室內好多人，當我以為冇位想走嘅時候，店員話可以上樓上坐，原來樓上有雅座！樓上有圓枱，可以一班人圍埋一齊坐。上網見呢度有燒賣食，話係每日新鮮手工製作，一於試下。估唔到有「芫茜燒賣」！啱曬我呢個鍾意芫茜嘅人！朋友就不太好芫茜，佢就嗌左原味「蒸手工燒賣」。有竹籤比食客拮住黎食，保留到街邊檔嘅風味。另提供豉油和辣油各一碟，有辣有唔辣，任君選擇。「芫茜燒賣」有驚喜，重係限量供應，芫茜控必試！將芫茜切碎，灑在燒賣上，入口好香芫茜味～🥰加左芫茜頓時令燒賣變成一款健康小食。食完燒賣唔夠喉，重想嗌d小食。嗌左「滷水雞中翼」。滷水雞中翼啖啖肉，鹹鹹甜甜好入味😋。見「屋邨仔精選套餐」有「牛腩蛋芝士三文治」，好好奇味道如何就嗌個試試。嗌左「牛腩蛋芝士三文治」🥪加$18配黑糖仙草奶茶。想講呢個唔係一般嘅三文治，我本身以為係將牛腩切成免治牛肉咁，原來係用一粒粒牛腩做餡！包烘得脆口但唔窿，火喉和烘焙嘅時間都控制得十分到位，要讚一讚師傅嘅廚藝👍🏻。芝士烘過呈流心狀，同蛋「熔」為一體，超香！芝士同牛腩嘅味道原來係咁夾架