神輿日本料理 (已結業)

好朋友升左職話要請我食飯，我就決定揀放題食盡佢！今次揀左旺角呢間神輿，見到門面都好有日式神舍風，裝修得好靚。入面都好有日式style，而且座位之間都好闊落，有空間感坐得好舒服。基本上一般日式放題有既食物種類呢度都有，刺身，壽司，小食，熱食，天婦羅應有盡有。刺身壽司係必點項目，每樣都好新鮮，完全唔似係放題，係似日本餐廳既質素。而且呢度每件壽司都細細件，唔怕好快飽，食多幾樣野都冇問題！最令人興奮係呢度有任食海膽壽司同手卷，平時出去食一碟海膽壽司都幾十蚊啦！而且呢度比既海膽份量絕對唔少，仲完全唔腥，好鮮甜，食多幾件已經回本！除左刺身壽司，朋友食放題每次都會食比較少人叫既熱食，但呢度既熱食真係好有驚喜，絕對值得一叫！特別推介牛油粟米同牛油炒雜菇。兩碟牛油味十分之香，炒雜菇唔會水汪汪，我地encore 左2次！仲有拉麵同烏冬都唔錯，唔會過淋，而且仲有一大片叉燒同魚蛋。飲品選擇都唔少，罐裝飲品同熱嘅花茶都有。雖然每類食物既選擇唔算話超級多，但貴精不貴多，樣樣食物都質素好高，好好味，而且價錢合理，值得一試。最欣賞係上菜好快，完全冇漏單錯單，呢樣野對於放題好重要！