老媽拌麵 (THE FOREST) (已結業)

今日同老公去左波鞋街買波鞋，行到又攰又餓，咁就去呢個商場搵食。一路上扶手電梯，見到呢間又大又光猛嘅餐廳，咁就比佢吸引左入左去。呢度真係好大，裝修簡約鮮明，好新好乾淨，坐位寬闊，坐得舒服服。打開餐牌有介紹餐廳，原來佢來自台灣，呢間已經係香港第五間分店，專門食關廟麵。佢仲有講解佢點做，重點係無防腐劑，手工天然曬乾。既然專門食麵，我哋點左一個湯麵，一個拌麵，兩杯飲品同一個飯後甜小食。清燉三寶牛肉湯麵：三寶係牛鍵、牛筋同牛肚，老公話三款都好淋，夠晒味，湯麵就揀左刀削麵，刀削麵好有韌性，湯底夠清入味，牛味濃，整體唔錯。私房花雕雞拌麵：份量正常，雞都算多。雞有淡淡花雕味道，酒味唔會過濃，連旁邊嘅糖心蛋都夠晒入味，鹹鹹地。我揀左刀削麵，拌麵醬汁濃，食落煙韌，原來用刀削麵做拌麵係咁好食。黃QQ：即係黃地瓜(蕃薯)加花生碎，即叫即製，入口熱辣辣，佢係好軟綿綿，湯丸口感，黃蕃薯果種甜味加埋花生碎，好好味。老媽黑糖珍珠鮮奶茶：茶味獨特，唔同出面飲開果d，呢度茶味係特別濃，但又唔會蓋住鮮奶味道，仍然覺得重奶味，黑糖味道亦剛好，唔太甜，我幾鐘意。荔枝綠茶：老公話果汁味重，但亦飲到綠茶味道，叫左少甜，佢話都幾好。