夢樂園 (已結業)

星期二同朋友嚟咗尖沙咀呢間樓上貓Cafe夢樂園食午餐，因為知道朋友有養貓同埋好鍾意貓，所以特登揀呢間餐廳。入到去睇睇餐牌，都幾驚喜，竟然係食中台式料理。食物選擇都幾多，我同朋友就揀咗酸菜魚麵、口水雞、紅豆冰同埋冬瓜茶，仲叫咗黑白雲耳同紅油抄手。食物好快就送到上枱，賣相幾靚仔，口水雞仲有配一碗鮮雞湯。特別值得一提嘅就係嗰碗酸菜魚，作為芫荽愛好者，佢上面嗰度芫荽已經超級加分。再者佢個魚係冇骨嘅，滑溜，湯底照顧得非常出色，酸辣味花椒味道平衡得好好。聽老闆娘講個湯係咬咗四五個鐘，叫我哋放心飲咗佢，確實飲得出唔係味精湯。六十零蚊喺尖沙咀貓Cafe食到咁嘅質素嘅酸菜魚的確好驚喜！同埋呢度嘅貓都好痴人，鍾意貓嘅朋友仔一定會要黎！