樺輝記 (已結業)

新年就到，又係時間出黎辦吓年貨。今日落左去荃灣出名嘅鋪頭買瓜子，買完之後就搵間餐廳食吓飯。行過呢間餐廳門口，之前未見過，應該是新開。見到門口寫住熱推海鮮粥，個樣超正，老公話好想食，咁不如就食吓先。餐廳環境乾淨，好光猛，牆上掛晒竹簡寫晒餸菜名，原來除左砂鍋粥，仲有小炒。我哋叫左個砂鍋粥、一個小炒同炒飯。砂鍋粥：先揀左個細粥底 (約2-3人份量)，跟住想要咩海鮮就自己揀。我哋揀左個是日海鮮藍蟹1隻，另外再加左一份海蝦。成個細砂鍋上枱，真係滖架，出晒煙。砂鍋粥真係唔錯，粥底鮮甜，好有蟹同蝦味果種鮮味，足料，老公勁讚，好鐘意。花膠海參扒時蔬：花膠同海參爽口，花膠份量都唔少，汁味道唔濃，原汁原味，西蘭花吸左少少汁都已經好食。蟹皇蟹肉炒飯：炒飯有鑊氣，入口又唔會好多油，食到啖啖蟹肉同蟹膏等味道，鹹鹹香香，夠晒味道。