華苑潮州餐廳 (已結業)

突然冇啦啦想打冷、食潮州嘢，而朋友仔要係尖咀開會，咁就去華苑試吓！推門入去，見唔係好爆，侍應叔叔問幾位、有冇訂枱，我舉起兩隻手指再搖搖頭，佢安排咗我哋坐張四人小圓枱。太花多眼亂，又太耐冇打冷，樣樣都好想食 嘅時候‧‧‧  我最後叫朋友仔點，費事驚我自己失控叫到食唔晒！先嚟碟螄蚶，睇落好似細隻咗啲，但隻隻都幾肥仔吓！好好味！！！ take order 嗰位姐姐話試過有個女仔一個人食三碟 ！ 咁下次我要叫多碟獨食都唔算過份吖！食到咁上下，凍烏頭上場。朋友仔有啲出乎意外咁話「佢切咗攤開晒」，我就覺得好窩心，切到一件件，夾起上嚟容易啲，又唔會夾到成條魚碎濕濕咁，讚 ！跟碟豆醬 (好似係) 上，魚肉點少少醬已經夠味！跟住係食潮州嘢指定菜式，鹵水拼盤，我哋嗰碟有鵝肉、大腸、紅腸、鹵蛋。本人覺得比想像中細碟，下次再食都係專注食一兩樣、單頭咁叫，應該會覺得抵啲！最尾，加個潮州牛丸湯，老實說，除咗啲牛丸係實啲彈啲之外，冇咩特別！本來想叫多個鵝肝，但真係驚食唔晒，俾藉口下次再嚟過！