發記粥麵

营业中

休息中

我認為, 香港最抵吃又好吃的, 粥品是首選。食碗有料粥, 一碟腸粉, 一係炒麵, 再肚餓d就食隻大大舊肥肉咸肉粽, 埋單平均為三十多元兩位。煲粥又唔係煮飯, 係要時間心機的。一碗美味粥品賣十元八塊, 背後所付出的時間心機誠意卻遠多於這十元八塊。我覺得賣粥品的, 跟種菜的, 都十分偉大。今天想吃得清清地, 決定試新野。棄所有肉類魚蛋檔, 選擇清清地的皮蛋瘦肉粥, 以及其標榜即拉的蝦米腸腸粉。皮蛋瘦肉粥分鹹肉及瘦肉, 瘦肉即肉片, 很少地方肯像此店, 將肉片售價跟鹹肉平起平坐的。粥底綿滑厚身, 感覺唔錯。肉片好似有少少味精, 我想鹹肉應該會好d。即拉蝦米腸碎濕濕, 賣相一般, 食落又幾滑幾香米味喎。蔥花又多, 蝦米又多又大粒(我認為切碎少少會好d), 加埋自便的腸粉四寶- 甜麻辣醬及芝麻, 這手藝只賣8蚊, 是抵到爛! 落單的哥哥默默地洗洗擦擦, 可是見到我倒瀉汽水, 又會唔聲唔聲地拎紙巾俾我。在這裡, 我不但吃了成擔心機, 仲吃到一般人情味。