盤子工房 (建生商場) (已搬遷) 新店位置

話說我有一個朋友仔一路都係屯門度住開，一直都推介我去呢間餐廳，但因為太遠嘅關係都冇去試，今日咁啱去開搵佢，所以就去咗呢間餐廳。一去到呢間餐廳門口就俾佢優雅嘅裝修震懾左，環境開陽，配合埋園林嘅背景，好適合渡過一個懶洋洋嘅週末。當然一個靚嘅裝修係唔夠嘅，都要配返個質素十分之高嘅食物，先至可以渡過一個完美嘅週末。首先，餐廳嘅食物種類好多，有：潛艇、意粉、漢堡包……絕對有一款係可以適合你。今次去到呢間餐廳，就試咗最穩陣嘅意粉，同埋潛艇。首先講吓佢嘅意粉，叫咗佢嘅蟹肉明太子炒意粉，本身會以為明太子嘅味道會蓋掛住蟹肉嘅鮮味，但係佢煮出嚟反而可以平衡到蟹肉嘅鮮味，同埋明太子之間嘅惹味。而且，意粉亦都唔會太鹹，味道啱啱好。之後佢嘅四重芝士潛艇，係充滿着邪惡嘅味道，濃濃嘅芝士香味充斥着成個口，蓋過住每一個味蕾感受區，令人食指大動。絕對值得一讚嘅係佢，有出邊好少見嘅鮮橙咖啡，估唔到橙同咖啡嘅味道可以咁夾，橙令到咖啡嘅香味更加突出，絕對適合文青打卡飲用。再配合埋一個咁舒適嘅裝修，唔經唔覺就坐咗半日，而且環境開陽，亦都唔會太嘈。相信下次如果想放鬆嘅時候一定會再嚟呢間餐廳。