酒鍋 (V Point) (已結業)

周街都有餐廳可以打邊爐，但要搵間高質嘅就唔係易事！酒鍋除左裝修靚之外，款色多，食物質素掂，吸晴程度梗係高喇！打邊爐最重要係乜？除左個爐之外，梗係湯底喇！呢個又話要食麻辣，嗰個又想試花膠黃油雞，咁就不如叫個醉生夢鍋，有齊五款湯底，大家都唔使爭喇！首先黎啲肉類先，叫左個掛架頂級安格斯牛小排，果然同網友影嘅相一樣，一片一片肥瘦均勻地掛喺個架度！輕輕淥幾秒，入口就能食到好香牛味！另一款係日本黑毛豬腩肉。一向都鍾意食牛多過豬，但呢款豬腩肉唔算太肥，烚完後都仲好嫩，味道相當好！海鮮類亦都係我精選之一！象拔蚌仔非常新鮮。花枝片切得薄，好快咁烚一烚，好爽口。仲有日本廣島蠔，好肥美，入口鮮甜！仲有個洋蔥豬肉蝦蛋餃，喺台灣試過後，念念不忘，估唔到喺酒鍋竟然可以重遇！呢款蛋餃外皮係用蛋造嘅，入面仲有新鮮配料，食厭傳統餃嘅，可以一試！個蔬菜拼盤又係值得一提，七彩繽紛，有椰菜花，粟米，南瓜，生菜，油墨菜⋯好新鮮，份量仲好多添！唯一係個即炸手工紫菜嚮鈴卷淋左少少，不過都食到好大片紫菜喺入面！今餐嘅滿意程度超高，對住咁靚嘅夜景打邊爐，個環境又舒適，配合埋咁好味嘅食物，真係貴價少少都值得呀！