和藏 (已結業)

食家德斯拿兄推介我食呢間上樓嘅 semi-buffet，我梗係唔會執輸啦。一上到去經已急不及待開啟蒲飛 mode，即刻攞大量長腳蟹，蝦同埋螺黎食先，咦，全部都好新鮮喎。跟住就攻擊回本嘅生蠔喇，生蠔新鮮肥美，海水味濃，每次限攞兩隻，由於每一次拎到返枱都急不及待即刻拍入口，所以每一轉都唔得閒影相。跟住就上套餐包嘅食物喇，月尾流流，我哋揀咗b餐謝安琪。鐵板秘醬蝦碌，有少少似茄汁蝦碌，隻蝦勁大，如果新鮮啲就更加好喇。黑松露醬伴磯燒鮑魚，呢味係全晚最愛，鮑魚燒得夠香口，襯埋黑松露醬簡直一絕。香草蜜汁京燒豬仔骨，呢碟份量夠大，啱哂係食肉獸嘅朋友。車打芝士培根脆件，麵包方面雖然屬於蝕本系列，但係呢個麵包烘得極香脆，上枱既時候仲係熱辣辣，加埋入面豐富嘅芝士同埋培根，我完全停唔到口。辣肉腸燴螺絲粉，揀得b餐謝安琪就梗係要食吓螺絲粉呢類食物啦，餐廳嚟咗意粉而唔係螺絲粉，仲好，我鍾意食意粉多好多，呢碟茄汁意粉看似地獄得黎又屬蝕本貨，但係由於我鍾意食茄汁，廚師煮得個醬汁又夠濃味，酸酸甜甜勁惹味，我成碟清哂。