紅樓 (已結業)

週未既晚上同朋友黎到登龍街視察下環境,睇下有咩啱心水既餐廳可以坐得舒服少少比我地慢慢傾下計食下野,途中見到呢間新開既紅樓見到樓底極高之餘空間又闊落就入去試試.香檳金蝦餃,蝦餃皮染上一層玫瑰香檳既顏色,係玫瑰香檳色再加上一片金箔格外顯得高貴.餃皮晶瑩剔透見到內裏蝦肉,質感煙韌綿糯.蝦餃富有鮮蝦味,肉質新鮮爽脆.蟹籽黑豚肉燒賣內即黑豚肉肉質唔會霉,咬落有嚼口,豚肉味香而不膻.中間咬到脆卜卜既蟹籽增添加口感.蘋果流沙包賣相十分討好,將麵粉染上翠綠既青蘋果色,再用上餅乾條扮蘋果梗,用手輕輕拉開,內裏既流沙奶黃十分流心即刻流晒出黎.奶黃餡內奶味比蛋黃味突出,中間帶淡淡蛋黃香.紅樓川味麻辣雞同平時食開既做法唔同,呢到既麻辣雞唔係偏向辣油較多既款式,係雞件上鋪上比較稠杰既麻辣醬汁,入口先辣後麻,麻勁都維持得幾耐川味白肉粉皮,白肉上鋪滿蒜蓉見到都感覺到蒜味有幾濃,白肉唔會好肥膩,瘦肉比肥肉多但入口唔會無肉味同顯得乾爭爭.底下粉皮吸盡碟下既蒜油,蒜味香又唔會過辣,附上四川辣汁更惹味,粉皮晶瑩通透而且入口帶點爽脆感,當夏天涼菜啱晒.