功夫點心

营业中

休息中

星期日，上完堂，黎到曾經係雜誌睇到，由藝人黃俊棠開既功夫點心，食番一盎兩件，休息一下。只係同幾位同學食野，都叫左唔小，有蟹粉小籠包，酥炸鯪魚球，黃金流沙包，涼瓜牛肉腸，燒賣，韮菜盒，貓耳拍小黃瓜，金沙糯米糍。一開波黎到既當然係屬於頭盤既貓耳拍小黃瓜，原來當中既小黃瓜姐係青瓜，幾新鮮，同凍鼓油亦搭配。未食完，燒賣同小籠包就送上，識食就緊係食左小籠包先，小籠包夠多汁，蟹粉味亦都夠濃，一個字，掂！燒賣都蒸得幾靚，蝦肉同豬肉溝埋都夠哂彈牙。黃金流沙包，比較普通，但呢個無咁甜，感覺比較健康。韮菜盒香脆可口，底部放有一張吸油紙，食落一Ｄ都唔油膩。涼瓜牛肉腸，睇相可以見到白中透露出內裡的肉餡，食落口感一流，亦都食到一絲苦瓜既味道，再配合甜鼓油，回甘味美。酥炸鯪魚球一上枱，有成８粒，第一個感覺只能夠話，抵食！而且亦炸得好食，咬左一啖，內裡原來混入蝦米等材料，令到普通既鯪魚球更好味道。最後既糯米糍，金沙既意思係花生粒，甜甜地，煙煙韌韌既感覺，的確幾中我既口味。